Кайгылуу ырлардын рыцары делген чыгармачыл инсан жөнүндө Sputnik Кыргызстан агенттиги кызыктуу фактыларды сунуштайт.
Ташкенттен келген жаш жигит. Жогорку окуу жайды бүткөндөн кийин эмгек жолун Кыргыз мамлекеттик академиялык драма театрынан баштап, ал жакта он жылдай актер болуп иштеген. Андан соң 18 жыл "Тунгуч" театрында эмгектенген. Чыгармачыл инсан өзүн кино жаатында да сынап "Боз салкын", "Апамдын махабаты", "Күлкүлятор" тасмаларында роль жараткан.
Кайгылуу ырлардын рыцары. Жаш кезинен ырга жакын болуп, музыкалык аспапта ойногон Асылбек Өзүбеков 1984-жылы алгачкы "Өмүр" деген ырын радиого жаздырып бат эле эл оозуна алынып кеткен. Кийин "Фаридам", "Гүлдөй жан", "Отуз жаш" өңдүү 40ка жакын чыгарма жараткан. Жалпы жонунан ал 70тей ырды эл алдында өтөсүнө чыгарып аткарып жүрөт. Чыгармаларынын көпчүлүгү сүйүү, арзуу темасында, ошондуктан аны "кайгылуу ырлардын рыцары" деп атап калышат.
Түбөлүктүү махабат. Белгилүү обончу өзүнүн болочоктогу жубайын 9-класста окуп жүргөндө кезиктирген. Кыз-жигит болуп сүйлөшүп жүргөн түгөйлөр мектепти бүткөндөн кийин эле баш кошкон. Алар 40 жылдан ашык убакыт бирге түтүн булатып эки кыз, эки уулду тарбиялап өстүрүштү. Артист бийбичеси менен алты небересинин кучагында бактылуу ирмемдерди өткөрүүдө.
Асылбек багбан. Рыспай Абдыкадыров атындагы сыйлыктын лауреаты азыр Бишкектеги эки театрда иштейт. Чыгармачылыктан сырткары, Ысык-Көлдө 10 гектар жерге алма, алмурут, өрүк, шабдалы тигип койгон. Багбанчылык менен алпурушканына 7-8 жылдын жүзү болду.