БИШКЕК, 27-фев. — Sputnik. Грек-рим күрөшү боюнча курама команда Бишкекте өтүп жаткан Азия чемпионатында эки күмүш жана эки коло медалга ээ болду.
Бүгүн, 27-мартта, күрөштүн грек-рим түрү боюнча Азия чемпионатынын биринчи күнү аяктап, балбандар беш салмак категориясында күч сынашты.
Маанилүү мелдеште биринчи байгени Жоламан Шаршенбеков (55 кг) камсыздап, күмүш тагынды. Ошондой эле дагы бир күмүш медалга Урмат Аматов (63 кг) ээ болсо, Азат Бейшебеков (87 кг) менен Мурат Рамонов (130 кг) коло байгеге татыды.
Ал эми 77 килограммда ат салышкан Эсен Асанов чейрек финалда эле утулуп калган.
Балбандар эртең дагы беш салмак категориясында грек-рим түрү боюнча күч сынашат. Алар: Каныбек Жолчубеков (60 кг), Роман Царев (67 кг), Акжол Махмудов (72 кг), Атабек Азисбеков (82 кг) жана Үзүр Жузупбеков (97 кг).