БИШКЕК, 24-фев. — Sputnik. "Боко Харам" террордук уюмунун согушкерлери Нигериянын Йобне штатындагы мектептен 111 окуучу кызды уурдап кетишти. Бул тууралуу РИА Новости жергиликтүү PM News басылмасына таянып кабарлады.
Буга чейин 46 кыздын жоголгондугу маалымдалган. Бирок алардын уурдалгандыгын полиция төгүнгө чыгарган.
2014-жылдын апрель айында "Боко Харам" тобу Нигериядагы Борно штатындагы Чибоко аймагынан 270ден ашуун кызды уурдаган. Топтун башчысы аларды камакка алынган согушкерлерине алмаштыруу талабын койгон, бирок өкмөт бул сунушка макул болгон эмес.
Кийинчерээк уурдалган алардын 20сы Эл аралык Кызыл Чырым уюмунун жардамы менен бошотулган. Калгандары туткундан өз алдынча качып кетип, боштондукка чыкканы маалымдалган. Ошол эле учурда 195 кыз дайынсыз жоголгон. 2017-жылдын май айында Нигериянын бийлиги уурдалган 82 кыз "Боко Харам" террордук уюмунун согушкерлерине алмаштырылып бошотулганын кабарлаган.
"Боко Харам" радикалдык тобу Нигериянын түндүк-чыгышында өз өкүмүн жүргүзүп келет. Террорчулар бир нече ири, кандуу терактыларды жасап, акыркы алты жылда 20 миң адамдын өмүрүн алган. Алар мунусун Нигерия, Чад жана Камерун өлкөлөрүндөгү аларга каршы жасалган аскердик кампанияга жооп иретинде жасадык деп билдирип келишет.
Ал эми "Ислам мамлекети" террордук уюму толугу менен талкалангандыгын Россия президенти Владимир Путин билдирген.