БИШКЕК, 22-фев. — Sputnik. Казакстанда кармалган депутат Дамирбек Асылбек уулу аты-жөнү өзгөртүлүшү боюнча мурдагы машыктыруучусу Мейрамбек Ахметов комментарий берди.
Белгилей кетсек, Асылбек уулу 8-классты бүткөндөн кийин Бишкекке келип Шералы Сыдыков атындагы республикалык олимпиадалык резервдер окуу жайына тапшырган. Ошол учурда анын машыктыруучусу Мейрамбек Ахметов болгон. Ал азырга чейин аталган окуу жайда бир нече спортчуларды тарбиялап келет.
Ахметов депутаттын мурунку аты Динарбек Супатаев экенин ырастап, Казакстанга кетээр алдында аты-жөнүн өзгөрткөнүн айтты. Ошондой эле ал Казакстандын желеги алдында Дүйнө чемпионатына катышып алдыңкы ондукка кирсе, Азия чемпионатында экинчи орунду ээлегенин белгиледи.
"Башында бизге Динарбек Супатаев деген ат менен келген. Кийин 1999-жылдары болсо керек, ошол маалда атасынын атына өтүп, "уулу" деген фамилия алуу мода болгон. Ошонун таасиринин бул дагы өзгөрткөн. Чынында эле атасынын аты Асылбек. Ал эми ысымы документ алып жатканда ката кетип калган окшойт. Туулган жылын да өзгөртүп койгонун билбейт экенмин. "Казакстанга барам, шарттары жакшы экен" деп жүргөн, балким ошондо маселе жаралып өзгөрткөндүр. Ал жакта төрт-беш жыл жүрүп келген", — деди Ахметов.
Ошондой эле ал Асылбек уулунун кыргыз спортуна зор салым кошуп келе жатканын айтып, мындай окуя күтүүсүз болгонун билдирди.
Эске салсак, 15-16-февраль күндөрү Казакстандын күч органдары коррупцияга каршы жүргүзгөн операцияда тогуз бажы постунда мыйзамсыз аракеттерди жүргүзгөн 35 адамды кармаган. Алардын ичинде Кыргызстандын үч жараны болуп, бирөө ЖК депутаты Дамирбек Асылбек уулу экенин ТИМ тастыктаган.
Анткен менен Казакстандын Тышкы иштер министрлиги Дамирбек Асылбек уулу Казакстандын жараны экенин айтып, КР Тышкы иштер министрлигине нота жөнөткөн.