Өзбекстан — Кыргызстан — Кытай жолу боюнча жүк ташуу жакында башталат

БИШКЕК, 21-фев. — Sputnik. Экспорттолуучу товарлардан турган "Ташкент — Анжиян — Ош — Эркеч-Там — Кашкар" деп аталган туңгуч автоколонна 25-февралда жолго чыгат. Бул туурасында Өзбекстандын Тышкы соода боюнча министрлиги кабарлады.

Автоунаалар Кашкарга жетип товарларды түшүргөн соң ушул эле жол менен импорттолуучу жүктү алып артка кайтат.

Кыргызстанда сатылчу өзбекстандык товарлардын тизмеси

8 Бирдин айы 2018, 19:24

Маалыматта биринчи этапта 80гө чукул автоунаа жолго чыкса, алардын санын акырындык менен 200гө жеткирүү пландалып жатканы айтылган. Азыр Кытайга текстиль, булгары жана айыл чарба продукциялары жөнөтүлсө, Өзбекстанга электр техникалык өнөр жай, машина курууга керек болгон жабдуулар алып келинмекчи. Жыл аягына чейин эки тарапка 100 миң тонна жүк ташылары белгилүү болду.

Министрлик бул демилгени Өзбекстан президенти Шавкат Мирзиёев 2017-жылы май айында Кытайга жасаган сапарында көтөргөнүн айтты. Анда автоунаалардын эл аралык жолун түзүү боюнча өкмөттөр аралык макулдашууга кол коюлган.

Кыргыз-өзбек мамилелери жандангандан тарта экономикалык кызматташуу да активдеше баштады. Буга чейин Өзбекстан аркылуу темир жол менен товар ташып келүү арзан боло баштаганы кабарланган. Өзбекстандын автожолдору аркылуу бажы төлөмүсүз товар алып өтүүнүн суммасы 10 доллардан 300 долларга көтөрүлдү.