БИШКЕК, 21-фев. — Sputnik. Кыргызстанда кенже эпосторду жайылтууга багытталган республикалык сынак жарыяланды. Бул тууралуу Билим берүү жана илим министрлигинин алдындагы илим-билим берүү комплексинин кызматкери Лера Уркунбаева Sputnik Кыргызстан агенттигине билдирди.
Анын айтымында, иш-чара Маданият, маалымат жана туризм министрлиги менен биргеликте уюштурулуп жатат.
"Сынактын биринчи туру башталды. Республика боюнча мектеп окуучулары, адабий ийримдердин өкүлдөрү кенже эпосторду театрлаштырылган түрдө көрсөтүүлөрү керек. Катышууну каалагандар Бишкекте болсо өзүбүз видеого тартып кетебиз, ал эми аймактагылар аткарып, бизге видеосун жөнөтсө болот", — деди Уркунбаева.
Республика боюнча топтолгон материалдар кийин мектептер үчүн окуу куралы катары даярдалып чыгарылат.
"Биринчи турда тандалган мыктылар Кыргыз драма театрында таланттарын тартуулайт. Анын жыйынтыгы менен жеңүүчүлөр тандалып баалуу белектер менен сыйланышат. Ошондой эле мыкты актердук чеберчилик, мыкты сценарист сыяктуу номинациялар дагы бар", — деди Уркунбаева.
Эмгектер үстүбүздөгү жылдын 6-апрелине чейин кабыл алынат.