БИШКЕК, 19-фев. — Sputnik. Кыргызстандык спортчу Эсен Калиев пауэрлифтинг боюнча Дүйнө кубогунда күмүш медалга ээ болду. Бул тууралуу Жаштар иши, дене тарбия жана спорт боюнча мамлекеттик агенттиктен кабарлашты.
Учурда Дубай шаарында мүмкүнчүлүгү чектелген спортчулар арасында мелдеш өтүп жатат. 16-февралда башталга турнир 22-февралда жыйынтыкталат. Кыргызстандын атынан Калиевден тышкары Сагынбек Махаматкул уулу, Жыргалбек Оросбаев, Адилет Камчыбеков, Максат Аргымбаев жана машыктыруучу Аднан Джабраилов жөнөтүлгөн болчу.
Мелдешке катышып жаткан кыргыз спортчуларынын ичинен биринчи болуп Эсен Калиев 59 килограмм салмакта күчүн сынады. Алгачкы аракетинде 158 килограмм, экинчи ирет 163 килограммдык штанганы ийгиликтүү көтөрүп, үчүнчү жолкусунда 173 килограммды көтөрүү аракети текке кетти. Жыйынтыгында спортчу экинчи орунду ээледи.
Спортчуларды иш-сапарга жөнөтүү үчүн спорттун олимпиадалык эмес түрлөрү боюнча дирекциясынан 552 миң сом бөлүнгөн.
Баса, мелдеште бактысын сынай турчу Жыргалбек Оросбаев "Sports Awards-2017" версиясында "Паралимпиада боюнча мыкты спортчу" наамына ээ болгон.