ОШ, 6-фев. — Sputnik. Кара-Суу райондук соту тыюу салынган радикалдуу "Йакын инкар" диний агымынын 24 мүчөсүн эки жылга эркинен ажыратты. Бул тууралуу райондук милициянын Экстремизмге жана мыйзамсыз миграциянын аракеттерине каршы күрөшүү бөлүмүнүн башчысы Руслан Омошев Sputnik Кыргызстан агенттигине билдирди.
Анын айтымында, 24 жарандын көпчүлүгү Кара-Суу районунун аймагына Ысык-Көл жана Жалал-Абад облустарынан келип, "Йакын инкар" диний агымынын ишмердүүлүгүн жүргүзүп келишкен.
Ал ошондой эле Кара-Суу районунда "Йакын инкар" диний агымынын мүчөлөрү активдешип, саны кескин көбөйгөндүгүн кошумчалады.
"Бул көйгөйлүү маселе деп айтсак болот. Себеби 2018-жылы бир ай аралыгында эле он мүчөсү каттоого алынды. Алар Жалал-Абад облусунун Сузак районунан келген жарандар экендиги аныкталды. Учурда бул боюнча төрт кылмыш иши козголуп, тергөө амалдары жүргүзүлүп жатат", — деди Омошев.
Райондук милиция кызматкерлери жана райадминистрация жетекчилери радикалдуу агымдар тууралуу жергиликтүү жашоочулар арасында түшүндүрүү иштерин жүргүзүп, маалыматтар камтылган баракчаларды таркатып жатышат.