БИШКЕК, 5-фев. — Sputnik. Талас облусундагы чипсы жасоочу заводду шекер кызылчасын иштетүүчү фабрикага айландыруу пландалып жатат. Бул тууралуу Sputnik Кыргызстан агенттигинин мультимедиалык маалымат борборунда өткөн жыйында өкмөттүн Талас облусундагы өкүлү Марат Мураталиев билдирди.
Буга чейин аталган заводко 40 миллион сом жумшалган. Бирок фабрика ишке кирген эмес.
Мураталиевдин айтымында, заводко жабдыктар жетишпей жаткандыктан иштебей турат.
"Фабриканы ишке киргизүү аракети болду. Бирок картошкадан жасалган классикалык чипсыларды чыгара алган жок. Андан көрө ордуна шекер кызылчасын иштетүүчү ишкана ачууну сунуштап жатабыз", — деди ал.
Ошондой эле объектини ишке киргизүүгө жоопкер тараптар жоопко тартыларын белгиледи.
Чипсы ден соолукка пайдалуу азыктардын катарын толуктай албайт, бирок картошканын буусу жөтөлдү басууга жөндөмдүү. Анын жол-жобосун Sputnik Кыргызстан маалымат агенттигинин материалынан окуңуздар.