БИШКЕК, 30-янв. — Sputnik. Бишкек ТЭЦинде болгон авария электр энергиясынын тартыштыгына алып келген эмес. Андыктан коңшу өлкөлөрдөн кошумча электр энергиясын импорттоого зарылдык жок экенин Sputnik Кыргызстан агенттигине Улуттук энергохолдингдин маалымат кызматынан билдиришти.
"Бул тууралуу сөз да болушу мүмкүн эмес. Электр жарыгын колдонуу боюнча кечки максимумга 150 мегаватт резерв энергиябыз бар. ТЭЦтин жаңы блоктору жылуулуктан тышкары, энергия дагы бөлүп чыгарат. Андан тышкары, ГЭСтерибиз турат. Авариялык өчүрүүлөр электр энергиясынын тартыштыгынан эмес, электр тармактарындагы бузулуулардан улам болуп жатат. Мындай көрүнүш Бишкекте гана, региондордо бардыгы штаттык реждимде иштөөдө", — деп түшүндүрүштү маалымат кызматтан.
Эскерте кетсек, 26-январь күнү кечинде ТЭЦте авария болуп, кубаттуулугу эки эсе төмөндөп кеткен.
27-январь күнү "Түндүк электр" ишканасы тургундарды электр энергиясын үнөмдөөгө чакырган.
Ал эми шейшемби күнү Кыргызстандын Башкы прокуратурасы Бишкек ТЭЦинин тегерегиндеги чуу боюнча премьер-министрдин кайрылуусунан кийин кылмыш жана жаза кодексинин 316-беренеси (Шалаакылык) менен кылмыш ишин козгоду.