БИШКЕК, 30-янв. — Sputnik. Кыргызстандын Башкы прокуратурасы Бишкек ТЭЦинин тегерегиндеги чуу боюнча премьер-министрдин кайрылуусунан кийин Кылмыш жана жаза кодексинин 316-беренеси (Шалаакылык) менен кылмыш ишин козгоду.
"Өнөр жай, энергетика жана кен пайдалануу мамлекеттик комитети, Улуттук энергохолдинг, "Электр станциялар" ААКсы, Бишкек ТЭЦи өкмөт бекиткен иш планын толук кандуу аткарган эмес. Мунун артынан ТЭЦтин ишинде тоскоолдуктар жаралып, ал өз убагында оңдолгон жок", — деп айтылат билдирүүдө.
Эскерте кетсек, 26-январь күнү кечинде ТЭЦте авария болуп, кубаттуулугу эки эсе төмөндөп кеткен. Бир күндөн кийин өкмөт көйгөй чечилгенин айтканы менен жылуулук берүү калыбына келген эмес. 29-январь күнү дагы бир түтүктөн жаракат кеткени белгилүү болгон.