БИШКЕК, 25-янв. — Sputnik. Борбор Азиядагы динге эң жакын өлкө деп Тажикстан аталганын The Telegraph басылмасына шилтеме берип Sputnik Тажикстан агенттиги жазды.
Анда айтылгандай, WIN/Gallup International ассоциациясы 2008, 2009 жана 2015-жылдары жүргүзүлгөн үч сурамжылоонун негизинде рейтинг түзгөн. Респонденттер "Өзүңдү динчил деп санайсыңбы?" деген суроого жооп беришкен.
Борбордук Азия боюнча жыйынтыктар төмөнкүчө:
Тажикстан — 85 пайыз эл динди катуу карманат;
Түркмөнстан — 80 пайыз;
Кыргызстан — 72 пайыз;
Казакстан — 64 пайыз;
Өзбекстан — 51 пайыз.
Белгилей кетсек, январь айынын башында Булан институту Чүй облусу менен Бишкектеги медреселердин окуучуларынын арасында сурамжылоо жүргүзүп, алардын басымдуу бөлүгү көп балалуу үй-бүлөдөн экенин аныктаган. Отчетто суралган студенттердин 5 пайызы үч бир тууган, 15 пайызы — төрт, 45 пайызы — беш, 20 пайызы — алты, 10 пайызы — жети бир тууган экени айтылган.