БИШКЕК, 20-янв. — Sputnik. Москвада 5-кабаттан кулап кетип оор жаракат алган кыргызстандык Жаркынай Юсупова Бишкекке алып келинди. Бул туурасында мекендешине жардам чогултуу иштерине катышкан KG-ROSS коомунун мүчөсү Зулпидин Нурматов билдирди.
Анын айтымында, бейтап бүгүн, 20-январда, кечки саат 18.00дө “Манас” эл аралык аба майданына келип түшкөн.
“Аэропорттон ары тез жардам унаасы менен алып кетишти. Эми ал белгилүү ортопед Сабырбек Жумабековдун көзөмөлүндө болот, дарыгер операциясын да жасап бермей болду. Ал кишиге жардам сурап кайрылганыбызда макулдугун берген”, — деди Нурматов.
Эскерте кетсек, кыргызстандык аял 1-январь күнү өзү жашап жаткан 5-кабаттагы үйүнүн терезесинен буту тайып жерге кулап кеткен. Кырсыктын кесепетинен эки буту, жамбашы сынган. Дарыланууга чама-чаркы жетпегендиктен бейтап коомчулуктан жардам сурап кайрылган болчу.
Жаркынай Юсупова Жалал-Абаддын Майлуу-Суу шаарынан болот, 5-класста окуган кызы бар. Анын Москва шаарында иштегендигине 10 жылга чукулдаган.