БИШКЕК, 10-янв. — Sputnik. Подмосковьеде киши колдуу болгон эки кыргызстандыктын сөөгү мекенине алып келинди. Бул туурасында Кыргызстандын Россиядагы элчилигинин маалымат кызматынан билдиришти.
Жарандык активист Жылдыз Осмонованын айтымында, маркумдардын сөөгү бүгүн таңкы саат 5.00дө "Ош" эл аралык аэропортуна келип түшкөн. Андан соң туугандары кичи мекени Өзгөндүн Куршаб айылына алып кетип, жерге беришкен.
Каза болгондордун бири уюшкан кылмыштуу топтун мүчөсү катары катттодо турганын КР ИИМи тастыктаган. Экинчиси бир ай мурун оорукчан уулуна операция жасатууга каражат чогултуу үчүн Москвага барганы айтылган.
Бул факты боюнча Москва облусунун Тергөө комитети тарабынан РФ Кылмыш жаза кодексинин 105-беренеси (адам өлтүрүү) менен кылмыш иши козголгон. Азыркы күндө полиция кызматкерлери менен бирдикте КР ИИМдин Россиядагы өкүлчүлүгү кылмыштын бетин ачуу боюнча иштерди алып барууда.