БИШКЕК, 7-янв. — Sputnik. Ирактын эмгек жана социалдык иштер министрлиги аткаминерлердин бири балдарды "Ислам мамлекети" террордук тобунун согушкерлерине саткан деген маалыматты текшерип жатат. Бул тууралуу Sputnik Өзбекстан агенттиги Ирактын Al-Sumaria телеканалына таянуу менен билдирди.
Ага ылайык, Найнава провинциясында майыптар менен иштеген бөлүмдүн директору шектелүүдө. Телеканалдын маалыматына ылайык, согушкерлерге түрдүү мамлекеттерден келген балдар сатылып турган. Анын ичинде Өзбекстан менен Россиядан келген балдар дагы бар.
Министрликтин өкүлү Аммар Минимдин айтымында, текшерүү иши министрдин жеке көзөмөлүнө алынды.
Буга чейин Дагестандын балдар укуктары боюнча атайын өкүлү Сирия менен Ирактын аймагында "Ислам мамлекети" террордук тобунун согушкерлери жок кылынгандан кийин Россия жана Орто Азия мамлекеттеринен келген миңдеген жарандар балдары менен коңшу араб өлкөлөрүндө баш калкалап жатканын билдирген.
Учурда 100дөй аял менен балдар чечен бийлигинин жардамы менен мекенине кайтты. Алардын ичинде Өзбекстан менен Казакстандын жарандары да бар.