Жабырлануучу Кубатова: үйдүн үстү урай баштады, баламды чүмкөп калууга араң жетиштим

Жазылуу
Акыркы маалыматтар боюнча кырсыктан 34 киши каза болду.

Бишкектин четирээк жагында, Сокулук районуна караштуу Дача-Суу айылына бүгүн эртең менен кулаган учак айылдын тургуну Бактыгүл Кубатованын үйүн тыптыйпыл кылып кетип, бирок анын ичинде уктап жаткан төрт киши аман калган. Бул туурасында жабырлануучу өзү айтып берди.

Биз шок абалындагы Кубатова менен Бишкек шаарындагы №4 ооруканадан сүйлөштүк. 

Авиакатастрофа самолета Боинг-737-200 в районе аэропорта Манас - Sputnik Кыргызстан
Кыргызстанда кандай авиакырсыктар катталган — 12 окуя
Үй урап, бактыга жараша, Бактыгүл Кубатова, жолдошу, 1 жаш 11 айлык уулу жана тогуз жаштагы кызын коңшулары уранды астынан сууруп чыккан. 

"Уктап жатканбыз. Бир маалда эмнегедир эле көзүмдү ачсам, терезеден… кыпкызыл жалынды көрдүм. Оюмду жыйып алгыча үй үстүбүзгө кулап түштү. Жанымда жаткан баламдын башын калкалап, анан жууркан менен чүмкөп калганга үлгүрдүм. Үйдүн үстү урай баштады. Сөздүн түптүз маанисинде алганда эле.. кум, топурак, анан шып кулай баштады. Баланы жапкан тейде жаттым, уулум чыркырап ыйлап баштады. Тогуз жаштагы кызым терезе жакта диванда уктап жаткан. Эмне кыларымды билбей калдым, күйөөмдү айтып, бизди алып чыгышсын деп кыйкыра баштадым. Уранды же түгөнбөйт, улам үстүбүзгө түшүп жатты", — деди Кубатова. 

Айгүл учурда аман калганына ишенип-ишенбей турганын, ал эми кырсык үйүн түп-орду менен шыпырып кеткенин айтты.

"Биз жылаңайлак, жылаңбаш, пижамачан кошунаныкына чуркадык. Айлананы карасам, бардык жак күйүп, өрттөнүп жатат. Ал эми биздин үйдү түп-орду менен алып кетиптир. Кантип аман калганыбызды билбейм. Көрүп алып шок болдум. Азыр деле кызыктай абалда турам. Күлөрүмдү же ыйларымды билбейм. Жаңы эле болуп өткөн окуя, көрүнүштү улам-улам элестетип алып жаман болуп жатам", — деди ал. 

Акыркы маалыматтар боюнча кырсыктан 34 киши каза болду.

Учактын кыйрашына байланыштуу бардык маалыматтардын топтомун бул жактан окуңуздар>>

Жаңылыктар түрмөгү
0