17-ноябрга караган түнү Бишкекте таксист өлтүрүлдү. Бул кылмышка шектелип жаңы конушта жашаган 19 жаштагы жаран кармалды. Ал таксистти отвертка менен моюнга сайып өлтүргөнүн айтып берди.
"Биз Ош базарына келдик. Ал жактагы досторумдан акча алып берейин дегем. Бирок аларда жок экен. Андан соң Дордой жакка айдаттым. Жолдо келе жатып айтыша кетип, аны чаптым. Ал мени муунтуп кирди. Отвертканы алып моюн тушка чапкам", — деди шектелген жаран.
Таксисттин денесин "Дордой" базары жактагы мүрзөгө алып барып ыргыткан.
Шектүү жаран мурду сүзүлгөн машинаны айдап алып кетип баратканда кармалган.
"Гагарин көчөсүн карап жүргөнбүз. Жаныбыздан оң капталы мыйрыйган машина өтүп кетти. Ага боёк чачылган окшойт деп ойлогонбуз. Бирок, ал кан болуп чыкты. Машинаны токтоттук, айдоочунун бети-башы жана машинанын ичи да кан экен. Машинаны айдап жүргөн жаран автоунаанын ээсин өлтүрүп алганын моюнга алды", — деп Бишкек ШИИБ Кайгуул милиция башкармалыгынын кызматкери Арлен Мамытов айтып берди.
Шектелип кармалган жаран жасагандарына өкүнө турганын билдирди. Учурда ал Бишкек ШИИБдин убактылуу кармоо жайына киргизилди. Ал Жалал-Абад облусунан болору жана 9-классты аяктаганы маалым болду.
Аталган факты боюнча Кылмыш жаза кодексинин адам өлтүрүү беренеси боюнча кылмыш иши козголду. Тергөө амалдары жүрүүдө.
