ДКО: көк бөрүдө кыргыз улакчылары казактарды 15:3 эсебинде утуп алды

БИШКЕК, 8-сен. — Sputnik. Дүйнөлүк көчмөндөрдүн II оюндарынын алкагында уюштурулган көк бөрүнүн финалында кыргыз улакчылары казактарды 15:3 эсебинде утуп алды. Бул тууралуу кабарчыбыз жеринен билдирди.

Белгилей кетсек, көк бөрү турниринде Кытайдын "Ала-Тоо" командасы үчүнчү, Башкыртстандыктар төртүнчү орунду алышкан.

Ошентип эл аралык көк бөрү турниринде Кыргызстандын улуттук курамасы биринчи орунга татыктуу болсо, Казакстандан келген көк бөрүчүлөр экинчи орунду ээлешти.

Финалдык бөлүк бүйүр кызыткан учурлар менен коштолуп, Кыргызстан курамасынын жигиттери намысты алдырган жок.

Биринчи орун үчүн 3, 5 миллион сом, экинчи орунга 1 миллион сом жана үчүнчү болгон командага 600 миң сом ыйгарылат. Демөөрчүлөр эң мыкты оюнчуга 100 миң сом берет.

Белгилей кетсек, 2014-жылы болгон  Дүйнөлүк көчмөндөрдүн I оюндарына Казакстандын көк бөрү боюнча командасы келген эмес. Анда дагы Кыргызстан чемпион болгон.

Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиа өнөктөшү.

Кыргызстан менен Казакстандын курама командаларынын көк бөрү оюнун жана ат майдандагы кыйкырык-сүрөөндү Sputnik Кыргызстан агенттигинин видеосунан көрүңүздөр>>