БИШКЕК, 16-янв. — Sputnik. Бишкек шаарындагы бир нече ресторандар авиакырсыкта жабыркагандарга жардам берүүгө даяр.
Эске салсак, эртең менен Гонконг — Стамбул каттамы менен учкан MyCargo Airlines авиакомпаниясына таандык Boeing-747-400F учагы саат 7.30дар чамасында "Манас" аэропортуна жакын жердеги Дача-Суу айылына кулап түшкөн. Анын кесепетинен отуздан ашуун киши каза болуп, 23 үй бузулган. 17-январь Кыргызстанда аза күтүү күнү деп жарыяланды.
Кырсык болгон жерге чатырлар тигилди.
Бүгүн кечинде Бишкектеги Prego, Barclays ресторандары менен Navat чайханасы жардам көрсөтөт. Жабыр тарткандарга 200 порция палоо, чай жана жылуу кийимдер жеткирилет.
Кимде ким жардам берүүнү кааласа Киев көчөсү 141/1 (Тоголок Молдо менен кесилишет), Чүй проспектиси 219 дарегине азык-түлүк жана кийим-кечелерди алып келсе болот.
Ошондой эле ӨКМ менен Бишкек мэриясы дагы жардамдарды чогултууда.
