БИШКЕК, 26-дек. — Sputnik. Бишкек шаары боюнча бекер троллейбус жүрүп баштаганын "Троллейбуста бекер жүрүү күнү" акциясынын уюштуруучусу Ринат Шамсутдинов Sputnik Кыргызстан агенттигине билдирди.
Ноябрь айынын башында "Троллейбуста бекер жүрүү күнү" акциясын өткөрүү үчүн каражат топтоо жарыяланган болчу. Чогулган каражатка төрт троллейбус ижарага алынды. Алардын ар бири күн сайын өз каттамы боюнча бекер жүрөт.
"№5 троллейбус саат 13.30да каттамга чыкты. Ал "Туңгуч" кичи районунан "Жалга" чейин жүрөт. Анын ичин кооздоп, жол кире бекер экендиги тууралуу маалыматтарды илип койдук. Троллейбустун ичинде шаардын тарыхы тууралуу кыргызча жана орусча аудиолор жаңырууда. Ошондой эле банктар, театрлар жана университеттер тууралуу маалыматтарды укса болот", — деди Шамсутдинов.
Активист троллейбустун ичинде жаңы жылдык ырлар да жаңырарын кошумчалады.
Бекер троллейбустардын жүрүү тартиби:
- 26-декабрь. №5 троллейбус, саат 13.30дан 21.38ге чейин;
- 28-декабрь. №11 троллейбус, саат 13.49дан 21.27ге чейин;
- 29-декабрь. №7 троллейбус, саат 14.18ден 21.37ге чейин;
- 30-декабрь. №10 троллейбус, саат 13.40тан 21.27ге чейин.
