БИШКЕК, 19-дек. — Sputnik. Кийинки аптада каалоочулар троллейбуста бекер жүрө алышарын активист Ринат Шамсутдинов билдирди.
Үстүбүздөгү жылдын 26, 28 жана 30-декабрында ал "Троллейбуста акысыз жүрүү күнү" деп аталган акция өткөрүп жатат.
Бул күндөрү №4, 5 жана 10 троллейбустар бардык жүргүнчүлөрдү акысыз ташыйт.
"Аталган акцияны өткөрүү идеясы сентябрда эле келген. Мен ал учурда түштүк аймактагы кичи райондордо жашап, борборго маршрутка менен каттачумун. Бир күнү троллейбуска түштүм, мага абдан жакты. Бир саат ичинде айрым иштеримди бүтүрүп алууга да жетиштим. Ошондо шаар тургундарын, ички мигранттарды үнөмдүү, ыңгайлуу жана экологиялык жактан таза унаага өткөрүү чечими келди", — деди Шамсутдинов.
Анын айтымында, алгач бир эле троллейбустун бир күндүк жол акысын төлөп берүү пландаштырылган. Бирок чогулган каражат 3-4 унаада бекер жүрүүгө шарт түзгөн.
Бүгүн активист Бишкек троллейбус башкармалыгынын жетекчилиги менен жолугуп, анын натыйжасында унаанын саны жана номери так аныкталат.
