БИШКЕК, 11-дек. — Sputnik. Ош эл аралык аэропортунда 11 каттамдын учактары аба ырайына байланыштуу кармалып турат. Бул тууралуу аэропорттун ыкчам кезмет нөөмөтүнүн башчысы Каныбек Ниязалиев Sputnik Кыргызстан агенттигинин аймактык кабарчысына билдирди.
Ниязалиевдин айтымында 11 каттамдын бешөө жергиликтүү ички каттам болсо калган алтоосу эл аралык багыт боюнча каттамдар болуп саналат.
"Ош — Бишкек багыты боюнча 5 каттамдын учагы аба ырайына байланыштуу уча элек. Мындан сырткары Ош — Москва, Ош — Самара, Ош — Санкт Петербург, Ош — Екатеринбург, Ош — Новосибирск багытынын учактары да тиешелүү адистердин учууга буйрук беруусун күтүп жатышат", — деди ал.
Ниязалиев кошумчалагандай, аэропорттун күтүү залындагы жүргүнчүлөргө администрация тарабынан түшүндүрүү иштери жүргүзүлүп жатат.
"Мындан сырткары ар бир авиакомпания өз жүргүнчүлөрүн мейманканаларга жайгаштырып тиешелүү жардамдарды көрсөтүп жатышат", — деди Ниязалиев.
Ал белгилегендей, кечээ 10 декабрь күнү аба ырайына байланыштуу Москва — Ош каттамынын учагы шартка байланыштуу "Манас" аэропортуна конгон. Азыр 11:20да Ош аэропортуна келип конгондугун кабарлады.
