БИШКЕК, 18-ноя. — Sputnik. Украина президенти Петр Порошенкону тамашага салган пранкерлер менен байланышта болгон кыргызстандык жаран кармалганын КР Тышкы иштер министрлиги билдирди.
Буга чейин Пранкер Вован деген лакап ат менен белгилүү Владимир Кузнецов "Украинанын президенти Петр Порошенко менен Кырызстандын президенти Алмазбек Атамбаевдин атынан" сүйлөшкөнүн Интернетке жарыялаган.
Украина президентинин маалымат катчысы Святослав Цеголко бул окуяга Кыргызстандын Тышкы иштер министрлигинин (ТИМ) кызматкерлеринин катыштыгы бар болушу мүмкүн деп билдирген.
КРдин тартип сактоо кызматкерлери тарабынан телефондук сүйлөшүүнү уюштурган пранкерлер менен байланышта болгон кыргызстандык жаран кармалгандыгын ТИМ кабарлады. Учурда кармалган адам тергөө иштин чоо-жайын аныктагыча камакка алынды.
2-ноябрда Украина президентинин расмий сайтында Порошенко Кыргызстандын президенти Алмазбек Атамбаев менен болгон сүйлөшүүсү тууралуу маалымат жарыялаган. Ал эми Кыргызстан президентинин аппараты өлкө башчысы украиналык кесиптеши менен сүйлөшпөгөнүн билдирип, ал тамаша болушу ыктымалдыгын айткан. Кийинчерээк Украина президентинин сайтынан бул маалымат алынган.
