БИШКЕК, 19-сен. — Sputnik. Кара-Суу базарында картондун үстүндө уктап калган бала менен анын бир айлык карындашы Ош шаардык балдар жана үй-бүлөнү реабилитациялоо борборуна убактылуу жайгаштырылды.
Буга чейин соцтармакта Ош облусундагы болжол менен Кара-Суу базарында картондун үстүндө уктап жаткан баланын сүрөтү талкууга алынган. Кийинчерээк ал баланын аты Ихсак экени, апасы Зулфия Үсөнованын төрт баласы бар экени аныкталган. Мындан сырткары, үй-бүлөнүн жашаган жери жана документтери жок болгону белгилүү болгон.
Аталган борбордун жетекчиси Роза Садированын айтымында, бир айлык ымыркайга эне сүтүн алмаштыруучу азык берилет. Эки бала анда алты айга чейин тарбияланат.
Энеси балдарына каалаган учурда барып тура алат.
Кара-Суу райондук Социалдык өнүктүрүү башкармалыгынын башчысы Куттубек Абдуллаевдин айтымында, Үсөнованын батир жана документ маселеси чечилгенден кийин балдарына күбөлүк берилип, жөлөк пул чыгаруу аракеттери көрүлөт. Ошондон кийин гана ага балдарын борбордон алып кетүүгө уруксат берилет.
