БИШКЕК, 29-авг. — Sputnik. Москвадан кыз-келиндердин сөөгүн алып келген учак Ош эл аралык аэропортуна келип конду. Бул туурасында аба майдандан Sputnik Кыргызстандын кабарчысы билдирди.
Алардын каза болгондордун туугандары, андан сырткары өкмөттүн Ош болусу боюнча ыйгарым укуктуу өкүлү Таалайбек Сарыбашев, Ош шаарынын мэри Айтмамат Кадырбаев, Кара-Суу, Араван, Өзгөн райондорунун акимдери күтүп турушат.
Мурдараак КРдин Россиядагы элчиси Болот Отунбаевдин маалыматында 10 кыз-келиндин сөөгү Ошто калат, калган төртөөнү Бишкек шаарына алып кетишерин билдирген.
"Аэропотто ИИМдин жана ӨКМдин кызматкерлери бар. Мындан сырткары аэропорттун аймагында алты Тез жардам унаасы турат", — деп билдирди кабарчы.
Вице-премьер-министр Гүлмира Кудайбердиева башында турган жумушчу топ 28-августта, Москва шаарына учуп кеткен. Топтун курамына курман болгондордун жакындарына жана туугандарына көмөк көрсөтүү үчүн өзгөчө кырдаалдар министри Кубатбек Боронов, Саламаттык сактоо министрлигинин жана Мамлекеттик миграция кызматынын өкүлдөрү, дарыгерлер, психологдор киргизилген.
Курман болгондордун сөөгүн алып келүү, жерге берүүгө байланыштуу чыгымдарга тийиштүү бардык маселелер өкмөт тарабынан чечилет.
