Аксыда Үңкүр-Тоого байланышкан жагдайдан улам жергиликтүү эл митингге чыкты

БИШКЕК, 27-авг. — Sputnik. Аксы районун жашоочулары Үңкүр-Тоонун айланасындагы түзүлгөн кырдаал боюнча нааразычылык акциясына чыгышты. Бул тууралуу жергиликтүү тургун Медербек Куттубеков билдирди.

Анын айтымында нааразычылык акциясына 200дөн ашуун адам катышты.

"Учурда Аксы эли Үңкүр-Тоодогу маселени батыраак чечүү жана Өзбекстан кармап кеткен кыргыздарды бошотуу талабы менен митингге чыкты. Нааразычылык акциясына Ички иштер министринин орун басары Курсан Асанов, экс-депутат Азимбек Бекназаров келди", — деди Куттубеков.

Ал эми экс-депутат Азимбек Бекназаров эл тынч тарап кеткендигин билдирди.

"Эл бир метр жерди Өзбекстан тарапка бербейбиз деген талап менен митингге чыкты. Мындан сырткары алар Өзбекстандык күч кызматкерлери кармап кеткен кыргыз жарандарын бошотуп бергиле деп жатышат. Бийлик өкүлдөрү менен жолуккан соң тынч тарап кетти", — деди Бекназаров.

Ал эми Ички иштер министринин орун басары Курсан Асанов эл бийликти туура түшүнүү менен кабыл алгандыгын айтты.

"Нааразычылык акциясына чыккан элдин суроолоруна жооп берип, түзүлгөн кырдаалды түшүндүрдүк. Эл бийлик өкүлдөрүнө суроо берип, ага жооп алган соң туура түшүнүп, тынч тарап кетти", — деди Асанов.

Эскерте кетсек, буга чейин кыргыз-өзбек чек арасындагы талаштуу жерде жайгашкан Үңкүр-Тоого коңшу өлкөнүн жети милиция кызматкери тик учак менен конгон. Мындай кадамды түшүндүрүү талабына өзбекстандыктар буга чейин кыргыз чек арачылар тарабынан кармалган Өзбекстандын милиционерин бошотуу жана Орто-Токой суу сактагычынын айланасындагы милиция постторун алуу талабын коюшкан. Сүйлөшүүлөрдөн соң аталган кызматкер бошотулган. 

24-август күнү коңшу өлкөнүн чек арачылары Үңкүр-Тоодо орнотулган телемунарада иштеген кыргызстандык төрт адисти кармап кетип, аларды Янги-Курган райондук милициясына алып барган.