БИШКЕК, 14-июл. — Sputnik. Талас районундагы Көк-Ой айылында жети жашар Байэл сууга агып кеткен үч жашар наристенин өмүрүн сактап калды. Бул тууралуу Sputnik Кыргызстан агенттигине жеткинчектин чоң атасы Нурман Арыкбаев айтып берди.
Окуя 13-июлда каш карайган маалда болгон. Жубайы жана эки небереси менен сарымсак казып жаткан Арыкбаев күн батып баратканына байланыштуу Байэл менен Бексултан аттуу неберелерин тоокторду короого киргизүү үчүн үйгө жөнөткөн.
"Үйгө кеткен бойдон жок болуп кетишти. Эмне болду деп жолго чыга калсак Байэл үч жашар кошунанын Бекназар деген баласын жетелеп, үйүнө жеткирип баратыптыр. Көрсө кичинекей Бекназар былтыр курулган лотокко тайып кетип, кулаган экен. Суу абдан шар аккандыктан аны тез эле агызып кетиптир", — деп билдирди Арыкбаев.
Анын айтымында бала агып баратканда Байэл анын алдынан чуркап, ыңгайлуу жерди таап бир колу менен лотокту, экинчи колу менен баланын бутунан кармап сүйрөп чыккан.
"Эмнеге бизге чуркап келип айткан жоксуң десек, "сиздерге келгенче бала агып кетмек да" деп бизди шердентти. Неберебиздин мындай баатырдык кадамга барарын такыр күткөн эмеспиз", — деди Арыкбаев.
Байэлдин чоң атасы билдиргендей ал мектепте бешке окуп, сүрөт тартканды жактырат. Ал эми "келечекте ким болгуң келет?" деген суроого Байэл "куткаруучу болгум келет" деп жооп берди.
