БИШКЕК, 11-июл. — Sputnik. Азимжан Аскаров боюнча бүгүнкү боло турган соттук отурумдан улам, Бишкектин Орозбеков көчөсү убактылуу жабылды. Бул туурасында Sputnik Кыргызстан агенттигине окурмандар WhatsApp аркылуу маалымдады.
Бүгүн Жогорку сот Азимжан Аскаровго өмүр бою эркинен ажыратуу боюнча берилген өкүмдү карайт.
"Жогорку сотко жакын жол жабылды", — деп билдирди окурман.
Бишкектин Кайгуул милиция башкармалыгынын маалымат кызматы соттук отурум учурунда Орозбеков жана Москва, Токтогул көчөлөрүнүн бир катар жерлериндеги кыймылга убактылуу чектөө киргизилгендигин кабарлады.
Кыргызстандын жараны Азимжан Аскаров сот органдары тарабынан улут аралык араздашууну тутандырып, массалык башаламандыктарды уюштургандыгы, ошондой эле 2010-жылдын июнь айындагы кайгылуу окуялар учурунда укук коргоо органында иштеген кызматкерди ырайымсыз түрдɵ ɵлтүрүүгɵ катыштыгы үчүн соттолгон. Куралсыз 13 милиция кызматкери нааразы болгон топко түшүндүрүү иштерин жүргүзүп баштаганда, ал топ тартип коргоо органдарынын өкүлдөрүн аёосуз сабап, ал эми аймактык милиционер Сулаймановду өлтүрүп, өрттөп жиберишкен.
ЕККУнун демократиялык институттар жана адам укугу боюнча бюросу менен Прессанын эл аралык институту дагы Азимжан Аскаровду бошотууну талап кылган.
Аскаровдун иши кайра кароо жараяны анын жактоочусунун берген арызында болмокчу. Анда жаңы жагдайлар ачылгандыгын айтышкан.
Кандайдыр бир өзгөчө окуяга, жаңылыкка күбө болсоңуз WhatsApp-каналга +996 706 566 544 номери боюнча кабарласаңыз болот.
