БИШКЕК, 8-июль. Sputnik. Бишкек – Ош унаа жолунун 421-чакырымында созулган автотыгын болуп, эл өтө албай турат деп жазды социалдык тармактын колдонуучусу Сэм Бараталиев аттуу жаран.
Ал эми Бишкек — Ош автожолу боюнча мамлекеттик дирекциянын жетектөөчү адиси Нурбек Кулуев 7-июлдун түнү ири жер көчкү түшүп, анын бир бөлүгү тазалангандан кийин эки тараптуу каттам ачылгандыгын билдирди.
На это надо как-то повлиять! Эти люди же останутся в темноте потом на перевалах! Может им топлива не хватит… pic.twitter.com/9o7SG0oDFe
— Sam Barataliev (@sam_des) 8 июля 2016 г.
Жолдо турган күбөлөрдүн айтымында, автотыгын Токтогул суу сактагычынын жанындагы шлагбаумда пайда болгон.
"Шлагбаум ушунчалык жай иштеп жаткандыктан, каттап жаткан автоунаалар каршы тилкеге чыга калып, жолду тосуп калышты", — деп жазган ал.
Бишкек — Ош автожолу боюнча мамлекеттик дирекция учурда түшкөн массанын 8 миң куб метри тазаланганын жана жол ишканалары дагы деле ал жерде иштеп жатканын билдирди.
"Бишкек – Ош унаа жолунун 421-чакырымына 7-июлда бийиктиги 4,5 метр, узундугу 50 метр, туурасы 20 метр болгон ылай аралашкан калдык урап түшкөн. Бир аз убакыттан кийин жеңил унаалар үчүн жол ачылган. Ал эми анын 8 миң куб метри жолдон тазалангандан кийин кечээ кечки саат бештерден тарта оор жүк ташуучу машиналар жүрө баштады. Учурда жол эки тарапка тең ачык", — деп билдирди Кулуев.
"Жеңил автоунаалар ооруп калгандар, шашылыш иши барлар жана жаш балалуулар жолдо кармалып калбасын деген максатта өткөрүлүп жатат", — деди Бекилов.
Кулуев аталган жерде Кара-Көл шаарынын №30 жана ага кошумча №28 жол тейлөө ишканаларынын жумушчулары техника менен иштеп жаткандыгын билдирди.
