БИШКЕК, 29-июн. — Sputnik. Алмазбек Атамбаев Түркиянын президенти Режеп Тайип Эрдоганга Стамбул шаарынын "Ататүрк" аба майданында террордук актынын айынан адамдардын курман болушуна байланыштуу көңүл айтты. Бул тууралуу президенттин маалымат кызматы билдирди.
28-июнда жергиликтүү убакыт боюнча кечки 9:20да Стамбул шаарынын "Ататүрк" аэропортунда теракт болуп, 36 киши каза болуп, 150дөй киши түрдүү жаракаттарды алган.
"Ататүрк атындагы аба майданында көп адамдын курмандыктарына алып келген террордук акты тууралу кабарды терең кайгыруу менен кабыл алдым. Кыргызстан эли боордош түрк эли менен кошо аза күтүп, террорчулуктун бардык түрүн кескин айыптайт", — деп айтылат мамлекет башчысынын телеграммасында.
Президент Алмазбек Атамбаев курман болгондордун жакындарына жана үй-бүлөлөрүнө кайрат айтып, ал эми жабыр тарткандардын тезинен сакайып кетишин тилеген.
