БИШКЕК, 25-июн. — Sputnik. Ветеринария жана фитосанитардык коопсуздук боюнча мамлекеттик инспекциясы Кыргызстанда күйдүргү дарты чыкканы боюнча тараган маалыматтарды төгүндөгөнүн мекеменин маалымат кызматы билдирди.
Саламаттык сактоо министрлиги бул маалыматты чагымчыл аракет болушу мүмкүн деп мүнөздөгөн. Жугуштуу оорулар ооруканасы дагы учурда күйдүргү дартына шектелип жаткан бейтаптар жок экенин билдирген.
Ветеринардык инспекция өлкөдөгү эпизоотикалык абал туруктуу экенин билдирип, күйдүргү дартына кабылган мал-жандыктар жок экенин маалымдады. Мындан улам мекеме жалган маалыматтарга ишенбөөгө чакырат.
"Бүгүнкү күнү дарт тарап кетет деген коркунуч жок. Бардык мал-жандык күйдүргү оорусуна карата эмдөөдөн өткөн", — деп мекемеден билдиришти.
Буга чейин Казакстандын Караганда облусунда күйдүргү дартына чалдыккан кишилер тууралуу маалыматтар тараган.
Эскерте кетсек, WhatsApp аркылуу жыл башында да чочко тумоосунан каза болгон жарандар тууралуу билдирүү тараган. Аны да Саламаттык сактоо министрлиги төгүнгө чыгарып, туура эместигин айткан.
