БИШКЕК, 17-апр — Sputnik. "Элдик парламент" оппозициялык бирикмесинин Г.А. аттуу мүчөсү кармалды. Бул тууралуу Улуттук коопсуздук комитетинин маалымат кызматы билдирди.
Коомдук бирикменин лидерлерине "бийликти күч менен басып алууга даярдык көрүү" боюнча козголгон кылмыш иштин негизинде уюмдун бир мүчөсүнүн үйү тинтүүгө алынган.
"Коомдук бирикменин Г.А. аттуу мүчөсү мыйзамдуу талаптарга баш ийбестен күч кызматкерлерине курал колдоно тургандыгын айтып, тергөө иштерине жолтоо болгон", — деп айтылат маалыматта.
Аталган факты боюнча 2016-жылдын 16-майында Башкы прокуратура тарабынан Г.А. аттуу жаранга карата кылмыш жаза кодексинин 341-беренеси (бийлик өкүлдөрүнө кол салуу) жана 318-беренеси (тергөө иштерине жолтоо болуу) боюнча кылмыш иши козголду.
Буга чейин бийликти күч менен басып алууга шектелип үч жаран кармалган. Сот Бекболот Талгарбеков, Марат Султанов жана Төрөбай Колубаевди эки айга камакка алуу чечимин чыгарган.
Камакка алынган коомдук бирикменин тарапташтары шаршемби күнү митинг өткөрүүнү пландашкан. Бирок ал ишке ашпай калды.
Ал эми бирикменин төрагасы Расул Умбеталиев алардын тарапташы Александр Гусеев күч кызматкерлери тарабынан кармалганын журналисттерге билдирген.
