БИШКЕК, 16-май — Sputnik. Бүгүн укук коргоочулар Азиза Абдрасулова, Төлөйкан Исмаилова баштаган укук коргоочулар өлкө президенти Алмазбек Атамбаедин кечирим суроосун талап кылып митингге чыгышты.
Белгилей кетсек, 12-майда "Элдик парламенттин" жыйыны өтүп, ага укук коргоочулар Азиза Абдирасулова менен Төлөйкан Исмаилова да катышкан.
Абдрасулованын айтымында, президент жалган маалымат таратканы үчүн жооп бериши керек.
"Эгер президент өз айткандарын расмий түрдө төгүндөп, кечирим сурабаса сотко беребиз", — дейт ал.
Ал ошондой эле Кылмыш жаза кодексинде жалган маалымат тараткандар кылмыш жоопкерчилигине тартылат деп жазылып турганын кошумчалады.
"Эгер биз кылмыш жасаган болсок жоопко тартсын. Президент болгонуна карабастан жалган маалымат таратканы үчүн жооп берсин", — дейт укук коргоочу.
Митингге чыккандар президенттин сүйлөгөндөрү кайсыл каналда, сайтта, гезитте жарыяланган болсо, ошолорго кайтадан төгүндөлсүн деген талапты коюп жатышат.
