БИШКЕК, 14-май – Sputnik. Кыргызстандын аймагында башаламандык жаратууга аракет жасагандарга катуу чара көрүлөт. Бул тууралуу президент Алмазбек Атамбаев Энелер күнүнө карата "Баатыр эне" орденин тапшыруу аземинде билдирди.
Өлкө башчы чет элдин акчасына сугарылган Элдик парламенттин мүчөлөрү Кыргызстандын келечегин ойлобостон кан төгүп болсо дагы бийликти басып алууну көздөп жатканын айтты.
Президент мамлекетте тынчтыкты сактоо үчүн күч структуралары менен УКМК кызматкерлерин катуу чараларды көрүүгө чакырды.
"Мен бул маселени бүгүн көтөрүп жатканымдын себеби, буга чейин энелердин көз жашы жакшы эле төгүлдү. Мындан ары андай көрүнүшкө жол берилбейт", — деди өлкө башчы.
Президент эл бузарлардын аркасында ким турса да коркпой тургандыгын айтып, кырдаалды дестабилдештирүүгө аракет кылгандарга кескин чаралар көрүлөрүн белгиледи.
