БИШКЕК, 12-май — Sputnik. Экинчи дүйнөлүк көчмөндөр оюнунда көк бөрүчүлөр коргой турчу атайын кийимдерди киет. Анын үлгүсүн Көк бөрү федерациясы маалымат жыйында көрсөттү.
Белгилей кетсек, быйыл сентябрь айында Ысык-Көлдө Экинчи дүйнөлүк көчмөндөр оюну өтөт.
КРдин Көк бөрү федерациясынын аткаруучу директору Султан Бекташев көрсөтүлгөн коргоочу кийимдер жаңы иштелип чыгып, буга чейинки кетирилген кемчиликтер эске алынганын айтты.
"Коргоочу кийимдин формасын биз сунуштаганбыз. Биздин эскиздер менен жасалды", — деди ал.
Бекташев көрсөтүлгөн коргоочу кийимдин үстүнөн ар бир команда өзүнүн формасын кийе турганын белгиледи.
Спорттун улуттук түрлөрүн өнүктүрүү дирекциясынын башчысы Алмазбек Касенов Көчмөндөр оюнунда Кыргызстандын атынан чыга турган курама команданын толук курамы май айында аныкталарын кошумчалады.
"Курама командада ойной турган оюнчулардын тизмеси ушул айдын аягына чейин аныкталат. Негизги басым Нооруз майрамына жана Улуу Жеңиштин урматына уюштурулган оюндарда жакшы ийгилик жараткан оюнчуларга жасалат", — дейт ал.
Учурда Көчмөндөр оюнунда көк бөрүгө катышуу үчүн түрдүү мамлекеттерден макулдуктар келип жатканын Көк бөрү федерациясынын аткаруучу директору Султан Бекташев кошумчалады.
Ошондой эле Экинчи көчмөндөр оюну үчүн параддык кийимдердин үлгүсүн жергиликтүү компания көрсөттү.
