БИШКЕК, 17-мар. — Sputnik. Кыргызстандын айрым маалымат каражаттары Жогорку Кеңештин депутаты парламент жыйынында телефондон Hill Climb Racing оюнун ойноп отурганын жазып чыгышкан.
Журналисттердин камерасы залдын "Республика — Ата-Журт" фракциясынын депутаттары жайгашкан оң бөлүгүн тартып калган. Депутаттын бети көрүнгөн эмес.
Камера тарткан жерде аталган фракциянын депутаты Нургазы Нишанов отурарын депутат өзү тастыктады. Sputnik Кыргызстан агенттигине берген түшүндүрмөсүндө эл өкүлү парламенттин жыйынында эч кандай оюн ойнобогонун билдирди.
"Ооба, бул орунда мен отурам. Бирок менин телефонумда эч кандай оюн жок. Өзүңөр көрсөңөр болот. Смартфондон кээде жаңылыктарды окуп, Facebook тармагындагы жеке баракчамды карайм. "Жыйында ойноп отурат" деген маалымат чындыкка дал келбейт", — деди Нишанов.
Мунун менен бирге депутат камерага анын өң-келбети түшпөгөнүн белгиледи.
