БИШКЕК, 26-дек. — Sputnik. Жалал-Абадда кармалган террорчулар "Ахмадия" диний агымынын мүчөлөрүнө кол салууга даярданып жүрүшкөнүн Ош ШИИБ билдирди.
Маалыматка ылайык, үстүбүздөгү жылдын 24-декабрында террорчулар аталган шаарда Нагима Айтматова көчөсүнүн №3 үйүнүн батиринде жашырынып отурган жеринен колго түшкөн.
Милициянын айтымында, кармалгандар Кара-Кыштак айылынын тургуну, "Ахмадия" диний агымынын мүчөсү 37 жаштагы Юнусжан Абдужалиловду өлтүрүүгө катыштыгы болгон. Топтун курамындагы алты кишинин төртөө Өзбекстандын жарандары экени аныкталган.
Иликтөө иштеринин натыйжасында кылмышкерлер Кара-Суу базарында соода кылган жарандарды талап-тоноого белсенип келгени анык болду.
Учурда камакта отургандардын Ош шаары жана Ош облусунда болгон кылмыштарга тиешелүүлүгү текшерилип жатат.
