БИШКЕК, 17-дек.— Sputnik. Sputnik Кыргызстан эл аралык агенттиги жана радиосу "Мен Кыргызстанды сүйөм" жаштар кыймылынын жана BishkekPark компаниясынын колдоосу менен жыл бою сайтка чыккан материалдардын каармандары үчүн "Жаңы жылдык кыял" кайрымдуулук долбоорун ишке киргизет. Sputnik Кыргызстан редакциясы менен Бишкектин дизайнерлеринен эксклюзивдүү жаңы жылдык балатылар "BishkekPark" соода жана көңүл ачуу борборунда аукционго коюлат.
Ар бир каалоочу жаңы жылдык майрамдын көрктүү жана чыгармачылык менен жасалган атрибутун сатып алып, аз камсыз болгон үй-бүлөлөрдүн балдарына жардам бере алат: аукциондун жүрүшүндө түшкөн бардык каражаттар алар үчүн белек алууга жумшалат. Аукцион бардык каалоочулар үчүн 23-декабрда саат 17:00дө "BishkekPark" соода жана көңүл ачуу борборунун аянтчасында ачылат (Киев к. 148, 2-кабат).
"Sputnik Кыргызстандын жамааты республиканын жашоочуларын келе жаткан Жаңы жылы менен чын дилинен куттуктайт жана бардык кайдыгер эмес, мээримдүү адамдарды кайрымдуулук долбооруна катышууга, балдардын жаңы жылдык кыялын орундатуу менен бирге кубантууга чакырат", — деп белгиледи Sputnik Кыргызстан эл аралык агенттиги жана радиосунун жетекчиси Елена Череменина.
Sputnik Кыргызстан маалымат агенттигинин кыргыз жана орус тилдүү версияларында 2015-жылдын жаз мезгилинен бери бир нече үй-бүлө каарман болгон. Булар: Памир Исмаевдин көп балалуу үй-бүлөсү; пенсионер жана II топтогу майып Карачач Касымованын үй-бүлөсү жана Михаил Замариндин үй-бүлөсү.
Sputnik (sputniknews.com) — ондогон өлкөлөрдө мультимедиялык маалыматтык хабдарга ээ маалымат агенттиги жана радио. Sputnik өзүнө сайттарды, аналогдук жана санарип радиоберүү, социалдык тармактарда баракчаларды камтыйт. Sputnik өз окурмандарына маалыматтарды күнү-түнү англис, араб, испан жана кытай тилдеринде сунуштайт.
