БИШКЕК, 26-ноя. — Sputnik. Ошто алты миллионунчу жаранды жарыкка алып келген Рахат Белекова ымыркайы менен төрөт үйүнөн чыкты.
Наристени апасы менен оорукананын оозунан шаар тургундары театрлыштырылган оюн-зоок менен тосуп алышты. Колуна сары майы менен нанын кармаган энелер ымыркайды оозантып, ак тилектерин айтышты.
Мындан тышкары, салтанатка вице-премьер Гүлмира Кудайбердиева менен шаар мэри Айтмамат Кадырбаев катышып, бул күндүн маанилүүлүгүн баса белгилешти. Андан кийин калаа жетекчиси кыздын атасына 100 миң сом тапшырды.
"Мааракелик" наристени тандоо үчүн өкмөттүк комиссия түзүлүп, ал Улуттук статистикалык комитет жана Саламаттык сактоо министрлиги менен бирге иштеди.
Премьер-министр Темир Сариев өлкө башчы Алмазбек Атамбаевге сүйүнчүлөп келгенден кийин президент Кыргызстан калкынын санынын өсүшү тынччылык менен бейпилдиктин белгиси экенин белгилеп, ымыркайга 1 миллион сомдук депозисттик эсеп ачып, үй-бүлөгө батир бөлүп берүүнү тапшырган.
Учурда эне менен кичинекей ымыркайдын ден соолуктары жакшы.
