БИШКЕК, 25 ноя — Sputnik. Ошентип, Кыргызстандын алты миллионунчу жараны жарыкка келди. Ага энеси Айлин деп ат бергенин атасы Алмаз Кожошев Sputnik агенттигине билдирди.
Бул ысым акыркы 20 жылда кеңири тарап, өзүнүн уккулуктуулугу, тыбыштык назиктиги менен көпчүлүккө жагат. Кыргызда эле эмес, көп элдерде кезигип жүрөт.
Мааниси да ар тараптуу.
Айрымдарын атайлы:
- Айлин – асманда айды тегерете курчап турган жарык нур;
- Айлин – ак жуумал сулуу;
- Айлин – бейиштин булагы;
- Айлин – назик ай.
Ал эми байыркы Руста Айлин деген атты жаңы төрөлгөн ымыркайга чиркөөдө экинчи ысым катары беришкен. Аны көпчүлүктүн кулагынан жашыруун кармап, ыйык тутушкан. Айлин адамдын өмүр бою коргой турган пиринин аты деп эсептелген.
Жаңы дүйнөгө келген Кыргызстандын алты миллионунчу жараны Айлин да ажарлуу, ак пейил жана бактылуу, жакшылыктан эч кемибеген инсандардан болуп өссүн.
Айлин аттуу азыркы белгилүү адамдар
- Пилар Химе́нес Гарсия – жаштар арасында жакшы таанымал испан ырчысы, Sirenia тобунун солисти, "Айлин" каймана аты менен белгилүү.
- Айлин Гоудж – америкалык жазуучу.
- Айлин Аслым — түрк ырчысы, аял укугунун активдүү коргоочу.
- Айлин Хекарт – америкалык актриса, "Оскар", "Эмми" жана башка сыйлыктардын ээси.
- Айлин Хачатурян — армян-ливан ырчысы. "Armenian Music Awards" сыйлыгынын ээси ж.б.
