БИШКЕК, 12-дек. — Sputnik. Борбордук шайлоо комиссиясы жекшемби күнү болуп өткөн референдумда ушунча көп бюллетень жараксыз болуп каларын күткөн эмес. Бул тууралуу БКШ төрайымы Нуржан Шайлдабекова маалымат жыйында айтты.
Кечээ, 11-декабрда, жергиликтүү кеңешке шайлоо жана Конституцияны өзгөртүү боюнча референдум болуп өтүп, ага алдын ала маалымат боюнча 1,2 миллион шайлоочу катышкан. Анын 955 миңи же 79,6 пайызы "макул" деген добуш берсе, 184 миңи же 15,5 пайызы каршы пикирин билдирген. 60 миң бюллетень жараксыз деп табылган.
"Мынча көп бюллетендин жараксыз болушу биз үчүн күтүүсүз болду. Кол менен саноо аяктагандан кийин мунун себебин тактайбыз. Бул автоматтык урнанын ашкере сезимталдыгына да байланыштуу болушу мүмкүн", — деди Шайлдабекова.
БШК төрайымы окуянын чоо-жайы сөзсүз аныкталарын кошумчалады.
