БИШКЕК, 26-окт. —Sputnik. Президент Алмазбек Атамбаев бүгүн, 26-октябрь күнү КСДП фракциясынын лидери Иса Өмүркуловду кабыл алып, көпчүлүк коалициясын түзүү мандатын тапшырды. Бул тууралуу президенттин маалымат кызматы билдирди.
Ал эми парламенттин бүгүнкү отурумунда коалициянын лидери Канат Исаев расмий түрдө көпчүлүк коалициясы тарагандыгы тууралуу жар салып, көп өтпөй президент өкмөттүн курамын таратуу боюнча жарлыгын чыгарды.
Мыйзам боюнча КДСП фракциясынын коалиция куроого 15 күн убактысы бар.
Белгилей кетсек, айрым серепчилер көпчүлүк коалициясына КСДП, "Кыргызстан" жана "Республика — Ата-Журт" кирерин айтышкан.
Буга чейин көпчүлүк коалициясына КСДП, "Өнүгүү — Прогресс", "Кыргызстан", "Ата Мекен" фракциялары кирип, жакында эле лидери болуп Канат Исаев дайындалган. Ал эми КСДП фракциясынын лидери Иса Өмүркулов бир канча ирет көз караштар дал келбесе, "Өнүгүү — Прогресс" менен "Ата Мекенди" коалициядан чыгып кетүүгө чакырган.
