Кызыл чеке талаштан соң референдум дайындоо демилгеси добуш берүүгө жөнөтүлдү

БИШКЕК, 19-окт. — Sputnik. Референдумду дайындоо боюнча мыйзам долбоору экинчи окууда добуш берүүгө жөнөтүлдү. 

Жогорку Кеңеште Баш мыйзамды өзгөртүү боюнча референдумду дайындоо мыйзам долбоору экинчи окууда каралып, кызуу талкууга жем таштады. 

"Ата Мекен" фракциясынын депутаты Каныбек Иманалиев өзгөртүүлөргө каршы пикирин билдирди. 

"Бул Конституцияны өзгөртүү боюнча алгач эле ээрге кыйшык отурдуңар. Москвада кыздарыбыз өрттөн каза болуп, аза күтүп жатканыбызда түштөн кийин коомдук талкууга коюлду. Бул акылга сыйбайт. Учурда Баш мыйзамдын түп нускасын таппай жатабыз. Бүгүндөн баштап Конституцияны өзгөртүү боюнча аракетти жазга чейин токтотолу", — деди Каныбек Иманалиев. 

Ал эми Алмамбет Шыкмаматов мыйзам боюнча Конституциянын түп нускасы президенттин аппаратында сакталышы керектигин айтып, бүгүнкү күнгө чейин түп нусканын бар-жогуна көз салбаган тиешелүү кызматкерлерди жоопко тартуу керектигин айтты. 

"Өнүгүү — Прогресс" фракциясынын лидери Бакыт Төрөбаев Баш мыйзамды өзгөртүү боюнча шашпоого чакырып, мыйзамсыз жол менен өзгөртүү киргизилип жатканын кошумчаласа, "Республика — Ата-Журт" фракциясынын лидери Өмүрбек Бабанов Баш мыйзамдын түп нускасын издөө менен убакытты кетирбөөгө чакырды. 

"Учурда талкуу болуп жаткан Баш мыйзамдын түп нускасынын бар-жогу боюнча талкуу — болбогон сөз. Убактыбызды эффективдүү пайдаланбайлыбы. Бизди башка жакка буруп баратат. Андыктан бул жакта убакытты текке кетирбей, тема боюнча сүйлөшөлү", — деди Бабанов.

Ал эми президенттин Жогорку Кеңештеги өкүлү Молдакун Абдылдаев тактоо киргизип жатканын айтып, архивде Баш мыйзамдын түп нускасы бар экенин айтты. 

"Урматтуу депутаттар, Конституциянын түп нускасы боюнча тактоо киргизип кетсем. Негизи архивде Убактылуу Өкмөт кабыл алып, Роза Отунбаева кол койгон мыйзам, ага тиркелген Конституциянын түп нускасы бар. Мен болгону ошону түп нуска деп эсептесе болобу дегенди айттым. Анткени анда карандаш менен оңдолуп, ар кандай шрифтер менен жазылган экен", — деди ал. 

"Бир Бол" фракциясынын депутаты Чолпон Жакупова депутаттарды жоопкерчиликке чакырды. 

"Мен учурдагы Конституциянын фанаты эмесмин. Анткени кемчиликтери абдан көп болчу. Логика боюнча аны өзгөртүүнү колдошум керек эле. Бирок мен өзгөртүүлөрдү колдой албайм. Анткени жаңы өзгөртүүлөр андан да жаман болууда. Өзгөртүүлөр кирсе жоопкерчилик биздин моюнга илинет. Албетте маселени эл чечет. Мен болгону элди эскерттим", — деди Жакупова. 

КСДП лидери Иса Өмүркулов бардык өзгөртүүлөр мыйзамдуу болуп жатканын айтып, элдин кызыкчылыгы корголуп жатканын кошумчалады.

Жандуу талкуудан кийин мыйзам долбоору экинчи окууда добуш берүүгө жөнөтүлдү. 

Конституцияга киргизиле турган өзгөртүүлөр жана референдум тууралуу Sputnik Кыргызстан агенттиги даярдаган материалдан окуңуз>>