БИШКЕК, 3-окт. — Sputnik. Кыргызстандын биринчи вице-премьери Мухамметкалый Абулгазиев жетектеген делегация Өзбекстандын Анжиян шаарына болгон сапарынын жыйынтыгы менен эки өлкөнүн үч облусу ортосунда өз ара кызматташтык жөнүндө меморандумга кол койду. Бул туурасында өкмөттүн маалымат кызматы кабарлады.
Бул мурдагы президент Ислам Каримов каза болгондон кийинки эки тараптуу кызматташуу боюнча алгачкы документ болуп калды.
"Облус жетекчилери чектеш аймактардагы тургундардын көйгөйлүү маселелерин талкуулоо үчүн айына бир ирет жолугушууларды такай өткөрүп турууну макулдашты. Эки тараптуу кызматташтыгын мындан ары өнүктүрүү үчүн Кыргызстан менен Өзбекстан делегациясынын сапарын уюштуруу пландаштырылууда", — деп айтылат таратылган маалыматта.
Меморандумга кыргыз тараптан Ош, Баткен, Жалал-Абад, ал эми өзбек жактан Анжиян, Фергана жана Наманган облустарынын жетекчилери кол койгон.
Өзбек тараптан премьер-министрдин орун басары Адхам Икрамов баштаган делегация кыргызстандыктарды кыргыз-өзбек мамлекеттик "Достук" көзөмөл өткөрүү жайынан тосуп алды.
Кыргыз делегациясы Анжиян шаарындагы кыргыз диаспорасынын өкүлдөрү менен жолукту.
Иш-чаранын алкагында кыргыз делегациясы Анжиян облусунун Хожо-Абад районундагы №10 орто мектепке, Анжиян мамлекеттик университетине, Анжиян шаарындагы Достук үйүнө, темир жол вокзалынын жаңы имаратына жана Асака шаарындагы автомобиль заводуна барды.
Кыргыз делегациясынын курамына Кыргызстандын Өзбекстандагы элчиси Данияр Сыдыков, Ош облусундагы өкмөттүн ыйгарым укуктуу өкүлү Таалайбек Сарыбашов, Баткен облусундагы өкмөттүн ыйгарым укуктуу өкүлү Абиш Халмурзаев, Жалал-Абад облусундагы өкмөттүн ыйгарым укуктуу өкүлүнүн биринчи орун басары Мамасалы Акматов кирген. Андан сырткары Ош шаарынын мэри Айтмамат Кадырбаев, ТИМ өкүлдөрү, аксакалдар, маданий ишмерлер, Ош, Баткен жана Жалал-Абад облустарынын жергиликтүү өз алдынча башкаруу жана спорт органдарынын өкүлдөрү болду.
