БИШКЕК, 13-сен. — Sputnik. Алты мамлекеттин башчысы Бишкекте боло турчу КМШ саммитине келерин тастыктады. Бул туурасында КР Тышкы иштер министрлигинин Интеграциялык биригүү департаментинин директору Болотбек Мукашев журналисттерге билдирди.
КМШга мүчө мамлекеттердин башчыларынын мааракелик саммити 16-сентябрда Бишкекте башталат.
Мукашевдин айтымында, Владимир Путин (Россия), Нурсултан Назарбаев (Казакстан), Эмомали Рахмон (Тажикстан), Ильхам Алиев (Азербайжан), Серж Саргсян (Армения) жана Александр Лукашенко (Белорусия) саммитке катыша тургандыктарын тастыктаган.
"Өзбекстандан жооп күтүп жатабыз. Молдованын атынан премьер-министр, Украинадан элчи жана Түркмөнстандын атынан өкмөт башчынын орун басары келери күтүлүүдө", — дейт ал.
Анын айтымында, Кыргызстан төрагалык кылгандан бери өлкөдө КМШнын 10го жакын иш чарасы өткөн.
