БИШКЕК, 23-апр. — Sputnik. ЕККУнун демократиялык институттар жана адам укугу боюнча бюросу менен Прессанын эл аралык институту БУУнун адам укуктары боюнча комитетинен кийин улуттар аралык жаңжалды курчуткан деп айыпталып жаткан Азимжан Аскаровду бошотууну талап кылууда. Бул тууралуу уюмдардын расмий сайтында маалымдалды.
Мындай билдирүү БУУнун адам укуктары боюнча комитетинин эксперттери 21-апрелде жарыялаган докладынан кийин жасалды. Документте "ал мыйзамсыз жана адам чыдагыс абалда кармалып турат. Андан сырткары уруп-согууга да кабылган" деп жазылган. Ушундан улам БУУнун эксперттери Аскаровду бошотуу талабын коюшкан.
"Биз Кыргызстанды БУУнун комитетинин корутундусуна түшүнүү менен мамиле кылууну талап кылабыз. Ошондой эле жарандык жана саясый укук боюнча эл аралык пактын милдеттерин сыйлоого чакырабыз жана Азимжан Аскаровду тезинен бошотууну талап кылабыз", — деп Прессанын эл аралык институтунун коммуникация боюнча директору Стивен Эллистин билдирүүсүндө айтылат.
ЕККУнун демократиялык стандарттар жана адам укуктары боюнча бюросунун директору Михаэль Георг Линк соттун чыгарган чечимин жокко чыгарууга чакырып, "Кыргызстан үчүн кетирген катасын оңдоого жакшы мүмкүнчүлүк болуп жатканын" кошумчалаган.
Июль айында (2015-жылы) АКШнын мамлекеттик департаментинин Азимжан Аскаровго "Адам укугунун коргоочусу" сыйлыгын ыйгарышы Кыргызстанда нааразычылыкты жараткан.
АКШнын мамдепартаментине жооп иретинде Кыргызстан АКШ менен 1993-жылдын 19-майында кол коюлган кɵмɵк кɵрсɵтүүнү жеңилдетүү боюнча кызматташуу келишимин бир тараптуу жокко чыгарган.
