Керри АКШ Азимжан Аскаровго сыйлык эмне үчүн бергенин саймедиреди

БИШКЕК, 31-окт. — Sputnik. АКШнын мамкатчысы Жон Керри Америка бийлиги Азимжан Аскаровду анын бүткүл өмүрүндөгү эмгектери үчүн жыйынтык катары сыйлаган деп жооп берди. Бул туурасында "Ала-Арча" резиденциясында Керринин брифингине катышкан Sputnik агенттигинин кабарчысы жеринен билдирди.

"АКШнын мамлекеттик департаменти жыл сайын адам укугу боюнча бир катар кишилерди аныктап, аларга сыйлык ыйгарат. Бул кабар Кыргызстанда нааразычылык жараткандыгы бизге маалым. Сыйлык ага бүткүл өмүрүндөгү эмгектери үчүн берилген, анда кайсы бир так иш-аракеттери деп белгиленген эмес. Биз кишини буга чейинки топтогон тажрыйбасы үчүн сыйлайлы дегенбиз", — деп айтты Керри. 

Кыргызстандын жараны Азимжан Аскаров сот органдары тарабынан улут аралык араздашууну тутандыруусу, массалык башаламандыктарды уюштуруусу, ошондой эле 2010-жылдын июнь айындагы кайгылуу окуялар учурунда укук коргоо орган кызматкерин ырайымсыз түрдɵ ɵлтүрүүгɵ катыштыгы үчүн соттогон. 13 куралсыз милиция кызматкери нааразы болгон топторго түшүндүрүү иштерин жүргүзүп баштаганда, ал топ тартип коргоо органдарынын өкүлдөрүн аёосуз сабап, ал эми аймактык милиционер Сулайманов өлтүрүп, өрттөлгөн. 

Июль айында (2015-жылы) АКШнын мамлекеттик департаментинин Азимжан Аскаровго "Адам укугунун коргоочусу" сыйлыгын ыйгарышы Кыргызстанда нааразычылыкты жараткан.

АКШнын мамдепартаментине жооп иретинде Кыргызстан АКШ менен 1993-жылдын 19-майында кол коюлган кɵмɵк кɵрсɵтүүнү жеңилдетүү боюнча кызматташууга байланыштуу келишимди бир тараптуу жокко чыгарган.