Бишкек, 26-фев. — Sputnik. КСДП фракциясынын лидери Чыныбай Турсунбеков депутаттарга "Кумтөр" маселеси боюнча ЖКнын чечимдерин аткарууну жана биргелешкен ишкана боюнча меморандумга кол коюусун марттын аягына чейин күтүүнү сунуштады.
Өкмөттүн азыркы ишине чечкинсиз деп баа берген фракция лидери, өкмөткө марттын аягына чейин дагы бир мүмкүнчүлүк, убакыт берүүнү сунуштады.
"Эч качан эки ай бере албайбыз, эл да күтүп жатат. Буларга ашып кетсе, марттын аягына дейре убакыт бериш керек. Эгерде ага чейин бүтүрө албаса, колунан иш келбеген, маселени чечпеген, жоопкерчилигин сезбеген өкмөт катары бул өкмөттөн кутулушубуз керек. Бул позицияны колдошуңуздарды сиздерден суранат элем. Бул өкмөт 30-мартка чейин ишти бүтүрбөсө, анда айтканын жасаган өкмөт менен алмаштырыш, бул ишти бүтүрүш керек деп ойлойм", — деди Турсунбеков.
Бүгүн парламент "Кумтөр" маселеси боюнча чыгарган токтомдордун ишке ашуусун талкуулап жатат.
