БИШКЕК, 29-июль — Sputnik. Россиянын Якутия боюнча Федералдык миграциялык кызматынын башкармалыгынын алдындагы чет элдик мигранттарды убактылуу кармоочу жайында эч ким кыргызстандык жаранды ур-токмокко алган эмес деп билдирди Sputnik агенттигине аталган мекеменин жетекчиси Виталий Браиловский.
Шейшемби күнү Якутиядагы кыргыз диаспорасы аталган мекемеде кыргызстандык жарандын аёосуз сабалганы тууралуу айтып, маалыматта ага эч кандай медициналык жардам көрсөтүлбөй жатканын кабарлаган.
Браиловскийдин айтымында эч ким кыргызстандык мигрантты урган эмес.
"Мусаев менен диаспоранын өкүлү Асан Кайдыкулов жолугуп чыкты. Ал аталган жаран менен сүйлөштү. Болгон окуяны ага жеткирдим. Мен телефон аркылуу, анын үстүнө, башка мамлекет менен сүйлөшүүдө эч кандай маалымат бере албайм", — деди Браиловский.
Чиновник Мусаевдин окуясы боюнча толук маалымат алуу үчүн редакция расмий түрдө кат жөнөтүшү керектигин кошумчалады.
