БИШКЕК, 15-янв. — Sputnik. Саратов облусунун Петровский районундагы жол кырсыктан каза тапкан жети жарандын бардыгы кыргызстандык болуп чыкты. Бул тууралуу РИА Новости аталган райондун башчысы Денис Фадеевге шилтеме берүү менен жазып чыкты.
Буга чейин Петровский районунун Нижний Новгород-Саратов автотрассасында Тарумовка айылынын тушунда жол кырсыгы катталгандыгы тууралуу маалымдалган. Анда тоок этин жүктөп Пензадан Саратовго бара жаткан фура карама-каршы келе жаткан Toyota үлгүсүндөгү унаа менен кагышып, жыйынтыгында эки унаа тең жолдон чыгып кеткен.
Кырсыктын кесепетинен Toyota үлгүсүндөгү унаанын айдоочусу менен алты жүргүнчү дароо көз жумган. КР ӨКМдин алдын ала маалыматы боюнча, каза болгон адамдардын бешөө кыргыз жарандары болушу ыктымал экени айтылган.
"Саратов облусу тараптан келе жаткан Toyota үлгүсүндөгү унаанын ичинде кыргызстандык жети жаран болгон. Алдын ала маалыматтар боюнча, алар ишке орношуу үчүн баратышкан. Алар кечээ кечинде Озинки пунктун кесип өтүшкөн (Россия жана Казакстан). Тилекке каршы кырсыктын айынан жетөө тең каза тапкан. Денелери Петровск шаарынын моргуна өткөрүлүп берилди", — деди Денис Фадеев.
Учурда Петровский району боюнча ИИМдин тергөө бөлүмү тарабынан 33 жаштагы фуранын айдоочусуна Россиянын Кылмыш жаза кодексинин 264-беренесинин 5-бөлүмү боюнча (жол эрежесин сактабоо) кылмыш иши козголду.
Volvo үлгүсүндөгү унаанын айдоочусу алкоголдук ичимдиктерди колдонбогону аныкталганы маалыматта белгиленген.
